கோளறு பதிகம்

பதினொன்றாவது பாடல்

தேனமர் பொழில்கொள் ஆலை
விளைச்செந்நெல் துன்னி
வளர்செம்பொன் எங்கும் நிகழ
நான்முகன் ஆதி யாய
பிரமா புரத்து
மறைஞான ஞானி முனிவன்
தானுறகோளும் நாளும்
அடியாரை வந்து
நலியாத வண்ணம் உரைசெய்
ஆனசொல் மாலை ஓதும்
அடியார்கள் வானில்
அரசாள்வர் ஆணை நமதே.

பொருள்-
தேன் பொருந்திய மலர்கள் நிறைந்த சோலைகளும், கரும்பின் ஆலைகளும், செந்நெற் பயிர்களும் நிறைந்து இந்த வளங்களால் மிகுந்த பொன்வளம் எங்கும் சிறக்கும். நான்முகன் முதற்கண் பூசித்து வழிப்பட்ட பிரமாபுரம் என்னும், சீர்காழியில் அவதரித்த வைதீக ஞானத்தை உடைய திருஞான சம்பந்தன், கோள்களும், நாள்களும் தொண்டர்களை வருத்தாதவாறு உரைத்த சொல் மாலையாகிய திருப்பதிகத்தை ஓதுகின்ற அடியவர்கள் மேலுலகத்தில் அரசராக ஆளக்கடவர்கள். இது நமது ஆணை ஆகும்.